Автор: Општина Кавадарци

Општина Кавадарци согласно програмата за поставување на урбана опрема продолжува со активностите за обезбедување уредени простори за забава и рекреација на децата. Во наредниот период треба да се изградат неколку нови забавни паркови на подрачјето од градот.

Оперативата на фирмата „ЗД-Горан“ од Кавадарци работеше на поставување на детски забавни реквизити во населбата „Ѓорѓи Соколов“ веднаш до новите тениски игралишта кај заобиколницата „Северен булевар“.

Новиот детски забавен парк зафаќа површина од 150м²  каде беа поставени  5 реквизити за игра и забава.

Веднаш после поставувањето на реквизитите, оваа површина треба да биде покриена со бекатон коцки, после што ќе следи и поставување на урбаната опрема која предвидува неколку клупи за седење како и типизирани канти за отпад.

Новиот детски забавен парк ќе биде надополнување на просторот за рекреација и спортување  во овој дел на градот веднаш покрај реката  Луда Мара, каде се наоѓаат и двете  нови тениски игралишта.

Градоначалникот на општина Кавадарци м-р Митко Јанчев, а на претходно барање од жителите на околните станбени објекти, покрена иницијатива за отстранување на бесправно поставените лимени гаражи на земјиште во сопственост на Република Македонија.

Во таа насока општината спроведува акција согласно која на почетокот сите иматели на ваквите објекти по писмен пат  беа благовремено информирани самите да превземат мерки за нивно отстранување. Општината навремено изготви известување кое беше налепено на сите лимени гаражи кои треба да се отстранат, со појаснување за идната намена на тој простор согласно деталниот урбанистички план на град Кавадарци.

Во моментот лимени гаражи се отстрануваат од неколку локации во градот. Најмногу бесправно подигнати лимени гаражи има на просторот кој се наоѓа помеѓу колективните станбени згради и индивидуалните станбени објекти на ул „Кочо Пацин“, ул.„Орце Николов“, булевар „Македонија“ и булевар „Никола Минчев“, вкупно 49 гаражи.

На оваа локација согласно ДУП предвидено е доасфалтиреање на паркингот како и хортикултурно уредување и поставање на урбана опрема.

На улицата „Блажо  Алексов“ треба да се размонтираат 5 гаражи, а на улица „Ѓорѓи Соколов“ 11 гаражи.

По нивното остранување општината овде ќе спроведе активност за дооформување на улиците во функција на новиот кружен тек којшто интензивно се гради.

Општината Кавадарци уште еднаш упатува апел до сите иматели на лимени гаражи, сериозно да пристапат во нивното демонтирање во законски определениот рок како би обезбедиле услови на нивно место да се оформат објекти согласно Деталниот урбанистички план.

Општина Кавадарци паралелно со акцијата за отстранување на бесправно подигнатите лимени гаражи на локации во градот, работи на уредување на простор каде тие гаражи би се дислоцирале.

На просторот покрај обиколницата „Северен булевар“  помеѓу мостот на реката Луда Мара па до спојот со ул „Ѓорѓи Соколов“ деновиве интензивно се расчистува  земјиште со површина од околу 9 000м² сопственост на Република Македонија, каде е предвидено изградба на урбанизирано плато за  дислоцирање на лимените гаражи.

Локацијата која е предвидена за плато за лимени гаражи се прави со цел сите бесправно поставени лимени гаражи на територијата на град Кавадарци да се дислоцираат овде со цел истите да бидат соодветно поставени и обезбедени од кражба.

За оплеменување на просторот и ставање во функција работи механизација од еден скип и 3 камиони, донација од фирмата „ЈА-МИ“ од Кавадарци, а за истата работа е ангажиран и багер од  ЈП „Комуналец“.

Општината Кавадарциги повикува сите сопственици на лимени гаражи кои ќе се дислоцираат активно да земат учество во оваа благородна акција чија цел е „поубаво Кавадарци“.