Категорија: Урбанизам и Комунални дејности

Реализацијата на програмата за комунално уредување се одвива непрекината. Оперативата на фирмата „АС -машини“ од Кавадарци реализира проект за поплочување на крак од улицата „12 Другари“ непосредно до фудбалското игралиште на  ФК „Габер“.

Се поплочува површина од 200м², а за оваа намена општината инвестира 315.000 денари.

Парите се обезбедени од буџетот на локалната самоуправа, сметка од програмата за комунална изградба. Поставувањето на бекатон коцки на оваа споредна улица во должина од 60 метри, општината го изведува како пристап до неколку индивидуални станбени објекти во овој дел на градот.

Општината Кавадарци започна со реализација на комунален проект за изградба на улица во селото Марена. Се работи за урбанизирање на земјена улица лоцирана на излезот од село Марена веднаш до локалниот асфалтен пат за селото Сопот.

Во оваа фаза се изведуваат земјените работи, по што ќе следи тампонирање на вкупна површина од 525м² од новата улица.

Во завршната фаза истата ќе се асфалтира и спои со локалниот пат кон село Сопот. Со раелизацијата на оваа улица повеќето куќи кои гравитираат во овој дел од Марена повеќе нема да се движат по пепел и кал кон своите домови.

Механизацијата на фирмата „Изолација“ од Скопје започна со реализација на втората кампања за ревитализација на неколку улици во градот.

Работите стартуваа со гребењето на старата и дотраена сфалтна подлога на улицата „Јован Планински“. Овде треба да се отстранат 1.700м² оштетен асфалт, по што ќе следува поставување на нова асфалтна маса во должина од околу 300 метри.

Овој зафат ќе ја чини општината 1.813.000 денари, а парите се обезбедени од буџетот од сметката за комунална изградба.

Општина Кавадарци го реализира проектот за изградба на спој на улицата „Желков дол“ со улицата „Фуштани“. Се работи за крак од улицата со површина од 605 метри квадратни, кој во оваа фаза на изградбата е пробиен со завршени земјани работи и тампониран.

Ќе следува поставување на рабници, па нејзино асфалтирање од страна на изведувачот фирмата „Изолација“ од Скопје“. Со реализацијата на овој проект се пробива поширока и побезбедна делница на спојот од споменатите улици.

За оваа намена општината ќе потроши 1.155.000 денари, средства од сметката за комунална изградба од општинскиот буџет.

Општина Кавадарци започна со нова кампања за ревитализација на улици во урбаните и месните заедници.

Според програмата во наредниот период ќе бидат реконструирани улиците: „Струшка“, „Владимир Назор“, „Јован Планински“, „Дисанска“ и една улица во селото Марена.

Оперативата на фирмата „Изолација“ започна со реализација на овој комунален проект со ревитализацијата на целата површина на улицата „Струшка“.

Во првата фаза се врши замена на старите и дотраени ивичници, по што ќе следува гребење на истрошениот и оштетен асфалт, за на крај да се постави нова асфалтна подлога.

Со реконструкцијата ќе се обнови асфалтот на површина од 1340м² на целата површина на улицата од спојот со улица „Киро Крстев“ до спојот со Улицата „Методи Џунов-Џико“.

За оваа намена општината ќе потроши 2.100.000 денари. Парите се од буџетот, сметка за комунална изградба.