Одбележани 79 години од стрелањето на дванаесетте Ваташки младинци

16 Јун 2022 by Општина Кавадарци in Настани

Денеска пред споменикот на дванаесетте Ваташки младинци, Градоначалникот Митко Јанчев заедно со членови на нивните семејства, советници од општинското собрание, пратеници и други делегации, достојно ја одбележаа 79 годишнината од нивното стрелање и им оддадоа почит за нивната храброст и непокорност.

Не е ова далечна историја па да ја заборавиме, да ја избришат. Нема! Затоа што во мислите остануваат зверските мачења од бугарскиот фашистички окупатор на дванаесетте ваташки младинци. Затоа што нивните семејства уште се живи и секоја година се потсетуваат на тој кобен 16 јуни. И затоа што ова е еден од најголемите злосторства во времето на Втората светска војна во Македонија.

„Смртта стана немоќна пред нашата младост исправена, пред очите наши загледани уште тоа утро во иднината”.

Овие зборови се напишани на нивниот споменик да сведочат за овој крвав злочин.

И затоа! Никогаш да не ги заборавиме страдањата кои македонскиот народ ги доживеал во таа четиригодишна окупација и да се гордееме со сите оние борци и сите храбри луѓе што помагале во тие времиња, за слобода на македонскиот народ.

Да не се повтори!

Вечна им слава!

Одбележан денот на пожарникарите во Кавадарци!

20 Мај 2022 by Општина Кавадарци in Настани

Денес заедно со градоначалникот на Општина Неготино Горан Стојанов, претставници од УНДП и директорот на Биро за регионален развој, присуствувавме на традиционалната парада составена од десет моторни возила специјализирани за противпожарна заштита, од страна на Противпожарната единица Кавадарци.

Справувањето со огнените стихии, кои се најголем противник на пожарникарите, претставува знаење, стекнато искуство, макотрпна работа, а најмногу храброст, одлика која е својствена за секој пожарникар.

Вашата подготвеност, пожртвуваност и професионалност, придонесуваат не само во заштита на човечки животи, туку и на материјални добра.

Нека е честит Денот на пожарникарите!

UNDP MK – 👩‍🚒 Пожарникарите се нашите херои. Тие се… (facebook.com)

Градоначалникот Митко Јанчев потпиша меморандум за деловна соработка со Универзитетот за туризам и менаџмент

30 Мар 2022 by Општина Кавадарци in Настани

Соработката на Општина Кавадарци со образовните институции е од исклучителна важност за целокупниот образовен процес во нашиот град. Квалитетното образование е клучен сегмент за сигурна иднина на нашите деца.

Денес градоначалникот Митко Јанчев со ректорот на Универзитетот за туризам и менаџмент од Скопје, г –дин Аце Миленковски, потпишаа меморандум за деловна соработка помеѓу универзитетот и Општината, преку кој во иднина во делот на образованието ќе се градат заеднички интереси, цели, активности и практикуми за студенти, но и ќе се придонесе за развојот на нашиот локален туризам.

Ова ќе биде од огромно значење за идните студенти и оние кои ќе сакаат да го продолжат своето образование токму на овој Универзитет.

Потпишување на договор за Советувалишен центар за помош и поддршка на жртви на родово базирано и семејно насилство

23 Мар 2022 by Општина Кавадарци in Настани

Денес заедно со градоначалниците на Неготино, Росоман, Демир Капија, претставници од Национална мрежа против насилство врз жените и семејно насилство и Здружение за родова еднаквост Визија Кавадарци потпишавме договор за воспоставување на Советувалишен центар за помош и поддршка на жртви на родово базирано и семејно насилство на локално ниво, во овие четири општини.

Главната цел на овој проект е да се подобри пристапот до специјализирани сервиси за жени и деца жртви на родово базирано и семејно насилство. Целна група се жртвите на родово базирано насилство и семејно насилство. Советувалиштето ќе биде лоцирано во Општина Кавадарци,на локација која е лесно достапна за лица со физичка попреченост, а ќе го користат жени и деца жртви на насилство од Општина Кавадарци, Неготино, Росоман и Демир Капија.

Се надевам дека со овој проект заеднички ќе успееме да дадеме поддршка и да го спречиме повторувањето на идно насилство кај жените, ќе овозможиме економско јакнење и осамостојување на жените жртви, и ќе го спречиме трансгенерациското насилство преку надминување на траумите и последиците.

ИЗБОР НА СПОРТИСТ ЗА 2021 ГОДИНА

25 Фев 2022 by Општина Кавадарци in Настани / Спорт

Вчера вечерта во Домот на културата ,,Иван Мазов Климе” се одржа манифестацијата – Избор на спортист за 2021 година во присуство на претседателот на сојузот на спортови, претседатели и претставници на спортските клубови од Општина Кавадарци, сите спортисти,тренери,пријатели на спорот, вљубеници и помагатели.

Кавадарци од секогаш бил спортски град, меѓутоа изминатите години, лично јас, но и како градоначалник се трудам да помогнам во подобрување на условите буквално во секој еден спорт кој успешно се развива и континуирано расте во нашиот град.

Резултатите кажуваат за тоа, сите успеси кои што ги доживеавме го потврдија нашиот дух, борбениот и спортски дух на тиквешијата и Кавадарци. Јас се додека сум на оваа позиција ќе се трудам максимално да вложувам и да се залагам за сите ние да продолжиме да бидеме горди на нашите деца, нашите сограѓани. Бидејќи спортот е многу важна алатка во психофизичкиот развој на децата а воопшто и за сите.

Честитки и благодарност на сите категории на спортисти, за нивните тренери, за нивниот придонес и заложби за освоени благодарници,медали за сите таленти јуниори и сениори.